BOLOMNWEL.
Bolomnwel
zur laniverser ti Zezi
dan mo sulye
mo ule enn mitrayet
ek de grenad
bolomnwel
pa gayn per
mo pa pu tuy person
mo pa enn teroris
lavyolans pa dan mo kiltir
dayer mo pli meg ki enn fey
papye ermel
li kler gran dimounn-la
pa finn design mwa
pu deklar Rambo
bolomnwel
donn mwa mo mitrayet
ek mo de grenad
mo zis anvi kone
kone ki si mo ule
mo kapav desann dan lari
pu eklat de-trwa sinbol
premie tomem
bolomnwel
avek to gro lagel
kuler manti
- zame finn konpran
kifer zanfan ris to donn gro kado
zanfan miser to donn
puppet plastic made in Trululu –
avek to surir ankuyonad
to leker ansilkan…
to enn kamuflaz
pu enn system
pa par azar
si to ruz ek blan kuma Coca Cola
to ekziste zis
pu donn kapitalis bonn konsyans
pu pas diber ar zanfan bondye
ala bolomnwel
san rankinn
pa bliye mo mitrayet
ek mo de grenad
mo pu netway mo sulye
byen prop
Wilson Bégué.